16 ਨਵੰਬਰ 2026 ਇੰਦੌਰ: ਮਸ਼ਹੂਰ ਪੰਜਾਬੀ ਗਾਇਕ ਦਿਲਜੀਤ ਦੋਸਾਂਝ ਇਨ੍ਹੀਂ ਦਿਨੀਂ ਆਪਣੇ ‘AURA India Tour 2026’ ਨੂੰ ਲੈ ਕੇ ਚਰਚਾ ਵਿੱਚ ਹਨ। ਇਸੇ ਤਹਿਤ ਐਤਵਾਰ ਰਾਤ ਮੱਧ ਪ੍ਰਦੇਸ਼ ਦੇ ਇੰਦੌਰ ਵਿੱਚ ਉਨ੍ਹਾਂ ਨੇ ਸ਼ਾਨਦਾਰ ਲਾਈਵ ਕੰਸਰਟ ਕੀਤਾ। ਹਾਲਾਂਕਿ, ਇਹ ਸ਼ੋਅ ਆਪਣੇ ਸੰਗੀਤ ਦੇ ਨਾਲ-ਨਾਲ ਵਿਵਾਦਾਂ, ਪਾਬੰਦੀਆਂ ਅਤੇ ਬੰਬ ਦੀਆਂ ਧਮਕੀਆਂ ਕਾਰਨ ਵੀ ਸੁਰਖੀਆਂ ਵਿੱਚ ਰਿਹਾ।

ਸ਼ੋਅ ਤੋਂ ਪਹਿਲਾਂ ਮਿਲੀਆਂ ਬੰਬ ਦੀਆਂ ਧਮਕੀਆਂ ਅਤੇ ਪ੍ਰਸ਼ਾਸਨਿਕ ਪਾਬੰਦੀਆਂ ਦੇ ਬਾਵਜੂਦ ਦਿਲਜੀਤ ਸਟੇਜ ’ਤੇ ਪਹੁੰਚੇ ਅਤੇ ਹਜ਼ਾਰਾਂ ਪ੍ਰਸ਼ੰਸਕਾਂ ਦਾ ਮਨੋਰੰਜਨ ਕੀਤਾ। ਇਸ ਦੌਰਾਨ ਉਨ੍ਹਾਂ ਨੇ ਮਰਹੂਮ ਸ਼ਾਇਰ ਰਾਹਤ ਇੰਦੌਰੀ ਦੀ ਸ਼ਾਇਰੀ ਸੁਣਾ ਕੇ ਆਪਣੇ ਆਲੋਚਕਾਂ ਨੂੰ ਵੀ ਅਸਿੱਧੇ ਤੌਰ ’ਤੇ ਜਵਾਬ ਦਿੱਤਾ। ਇਸ ਦੀ ਵੀਡੀਓ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀ ਹੈ।

‘ਮਹਾਕਾਲ ਦੀ ਧਰਤੀ ’ਤੇ ਮੈਨੂੰ ਕੋਈ ਨਹੀਂ ਰੋਕ ਸਕਦਾ’

ਇੰਦੌਰ ਦੇ ਡਿਲਾਈਟ ਦਸਤੂਰ ਗਰਾਊਂਡ ਵਿੱਚ ਹੋਏ ਕੰਸਰਟ ਦੀ ਸ਼ੁਰੂਆਤ ਦੌਰਾਨ ਦਿਲਜੀਤ ਨੇ ਪ੍ਰਸ਼ੰਸਕਾਂ ਨੂੰ ‘ਜੈ ਸ਼੍ਰੀ ਮਹਾਕਾਲ’ ਦਾ ਨਾਅਰਾ ਲਗਾਉਣ ਲਈ ਕਿਹਾ। ਉਨ੍ਹਾਂ ਨੇ ਕਿਹਾ ਕਿ ਇਹ ਬਾਬਾ ਮਹਾਕਾਲ ਦੀ ਪਵਿੱਤਰ ਧਰਤੀ ਹੈ ਅਤੇ ਉਨ੍ਹਾਂ ਨੂੰ ਇੱਥੇ ਆਉਣ ਤੋਂ ਕੋਈ ਨਹੀਂ ਰੋਕ ਸਕਦਾ।

ਗਾਇਕ ਨੇ ਕਿਹਾ ਕਿ ਉਹ ਪਹਿਲਾਂ ਵੀ ਨਹੀਂ ਡਰਿਆ ਅਤੇ ਨਾ ਹੀ ਹੁਣ ਡਰਦਾ ਹੈ। ਉਨ੍ਹਾਂ ਮੁਤਾਬਕ, ਪ੍ਰਸ਼ੰਸਕਾਂ ਦਾ ਪਿਆਰ ਅਤੇ ਸਮਰਥਨ ਹੀ ਉਨ੍ਹਾਂ ਦੀ ਸਭ ਤੋਂ ਵੱਡੀ ਤਾਕਤ ਹੈ।

ਰਾਹਤ ਇੰਦੌਰੀ ਦੀ ਸ਼ਾਇਰੀ ਨਾਲ ਦਿੱਤਾ ਜਵਾਬ

ਕੰਸਰਟ ਦੌਰਾਨ ਗੀਤਾਂ ’ਤੇ ਲਗਾਈਆਂ ਗਈਆਂ ਪਾਬੰਦੀਆਂ ਦਾ ਜ਼ਿਕਰ ਕਰਦਿਆਂ ਦਿਲਜੀਤ ਨੇ ਕਿਹਾ ਕਿ ਇਹ ਨਹੀਂ ਗਾ ਸਕਦਾ, ਉਹ ਨਹੀਂ ਗਾ ਸਕਦਾ, ਪਰ ਮੇਰੇ ਮੂੰਹੋਂ ਜੋ ਵੀ ਨਿਕਲਦਾ ਹੈ, ਉਹ ਸੱਚ ਹੈ।

ਇਸ ਤੋਂ ਬਾਅਦ ਉਨ੍ਹਾਂ ਨੇ ਰਾਹਤ ਇੰਦੌਰੀ ਦੀ ਮਸ਼ਹੂਰ ਸ਼ਾਇਰੀ ਸੁਣਾਈ:

‘ये सारा धुआं है, आसमान थोड़ी है।’

ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਸ਼ਾਇਰੀ ਦੀਆਂ ਹੋਰ ਸਤਰਾਂ ਰਾਹੀਂ ਆਪਣੇ ਆਲੋਚਕਾਂ ਨੂੰ ਸੁਨੇਹਾ ਦਿੱਤਾ। ‘किसी के बाप का हिंदुस्तान थोड़ी है’ ਵਾਲੀ ਸਤਰ ’ਤੇ ਦਰਸ਼ਕਾਂ ਨੇ ਖ਼ੂਬ ਹੁੰਗਾਰਾ ਭਰਿਆ।

ਹਿੱਟ ਗੀਤਾਂ ’ਤੇ ਝੂਮੇ ਪ੍ਰਸ਼ੰਸਕ

ਦਿਲਜੀਤ ਨੇ ਕੰਸਰਟ ਵਿੱਚ ਆਪਣੇ ਕਈ ਪ੍ਰਸਿੱਧ ਗੀਤ ਪੇਸ਼ ਕੀਤੇ। ‘5 ਤਾਰਾ’, ‘ਬੱਕਰੀ’, ‘Born To Shine’ ਅਤੇ ‘Do You Know’ ਵਰਗੇ ਗੀਤਾਂ ਨੇ ਦਰਸ਼ਕਾਂ ਨੂੰ ਨੱਚਣ ਲਈ ਮਜਬੂਰ ਕਰ ਦਿੱਤਾ। ਹਜ਼ਾਰਾਂ ਪ੍ਰਸ਼ੰਸਕਾਂ ਨੇ ਗਾਇਕ ਦੇ ਨਾਲ ਗੀਤ ਗਾ ਕੇ ਸਮਾਗਮ ਦਾ ਆਨੰਦ ਮਾਣਿਆ।

ਕੰਸਰਟ ਤੋਂ ਪਹਿਲਾਂ ਬੰਬ ਦੀਆਂ ਧਮਕੀਆਂ

ਜ਼ਿਕਰਯੋਗ ਹੈ ਕਿ ਕੰਸਰਟ ਤੋਂ ਠੀਕ ਪਹਿਲਾਂ ਇੰਦੌਰ ਵਿੱਚ ਸੁਰੱਖਿਆ ਨੂੰ ਲੈ ਕੇ ਹੜਕੰਪ ਮਚ ਗਿਆ ਸੀ। ਸ਼ਹਿਰ ਦੇ ਮੇਅਰ ਦਫ਼ਤਰ, ਤਿੰਨ ਵੱਡੇ ਬੈਂਕਾਂ ਅਤੇ ਤਿੰਨ ਨਿੱਜੀ ਸਕੂਲਾਂ ਨੂੰ ਈਮੇਲ ਰਾਹੀਂ ਬੰਬ ਨਾਲ ਉਡਾਉਣ ਦੀਆਂ ਧਮਕੀਆਂ ਮਿਲੀਆਂ ਸਨ।

ਸੁਰੱਖਿਆ ਏਜੰਸੀਆਂ ਵੱਲੋਂ ਜਾਂਚ ਅਤੇ ਤਲਾਸ਼ੀ ਮੁਹਿੰਮ ਚਲਾਈ ਗਈ। ਮੁੱਢਲੀ ਜਾਂਚ ਵਿੱਚ ਇਨ੍ਹਾਂ ਧਮਕੀਆਂ ਨੂੰ ਫਰਜ਼ੀ ਮੰਨਿਆ ਗਿਆ, ਜਿਸ ਤੋਂ ਬਾਅਦ ਸਖ਼ਤ ਸੁਰੱਖਿਆ ਪ੍ਰਬੰਧਾਂ ਹੇਠ ਕੰਸਰਟ ਕਰਵਾਇਆ ਗਿਆ।

Leave a Reply

Your email address will not be published. Required fields are marked *