ਨਵੀਂ ਦਿੱਲੀ: (11 ਜੁਲਾਈ 2026)
ਦੇਸ਼ ਦੇ ਚਰਚਿਤ ਸ਼ਰਧਾ ਵਾਕਰ ਕਤਲ ਮਾਮਲੇ ਵਿੱਚ ਦਿੱਲੀ ਦੀ ਇੱਕ ਅਦਾਲਤ ਨੇ 20 ਜੁਲਾਈ ਨੂੰ ਹੋਣ ਵਾਲੀ ਸੁਣਵਾਈ ਮੁਲਤਵੀ ਕਰ ਦਿੱਤੀ ਹੈ। ਇਹ ਫੈਸਲਾ ਉਸ ਵੇਲੇ ਲਿਆ ਗਿਆ ਜਦੋਂ ਮੁੱਖ ਦੋਸ਼ੀ ਆਫ਼ਤਾਬ ਅਮੀਨ ਪੂਨਾਵਾਲਾ ਨੇ ਅਦਾਲਤ ਨੂੰ ਦੱਸਿਆ ਕਿ ਉਸੇ ਦਿਨ ਉਹ ਤਿਹਾੜ ਜੇਲ੍ਹ ਵਿੱਚ ਐੱਮ.ਏ. (ਸੋਸ਼ਿਆਲੋਜੀ) ਦੀ ਆਖ਼ਰੀ ਪ੍ਰੀਖਿਆ ਦੇਵੇਗਾ।
ਅਦਾਲਤ ਨੇ ਆਫ਼ਤਾਬ ਦੀ ਅਰਜ਼ੀ ਮਨਜ਼ੂਰ ਕਰਦਿਆਂ 20 ਜੁਲਾਈ ਦੀ ਕਾਰਵਾਈ ਰੱਦ ਕਰ ਦਿੱਤੀ ਅਤੇ ਹੁਕਮ ਦਿੱਤਾ ਕਿ ਹੁਣ 21 ਜੁਲਾਈ ਦੁਪਹਿਰ 2 ਵਜੇ ਤੋਂ ਅਭਿਯੋਗ ਪੱਖ ਦੇ ਗਵਾਹਾਂ ਦੇ ਬਿਆਨ ਦਰਜ ਕੀਤੇ ਜਾਣਗੇ। ਬਾਕੀ ਪਹਿਲਾਂ ਤੋਂ ਨਿਰਧਾਰਤ ਤਰੀਕਾਂ ‘ਤੇ ਕਾਰਵਾਈ ਜਾਰੀ ਰਹੇਗੀ।
ਅਦਾਲਤ ਦੇ ਰਿਕਾਰਡ ਮੁਤਾਬਕ ਆਫ਼ਤਾਬ ਇੰਦਿਰਾ ਗਾਂਧੀ ਰਾਸ਼ਟਰੀ ਮੁਕਤ ਯੂਨੀਵਰਸਿਟੀ (IGNOU) ਤੋਂ ਐੱਮ.ਏ. ਸੋਸ਼ਿਆਲੋਜੀ ਦੀ ਪੜ੍ਹਾਈ ਕਰ ਰਿਹਾ ਹੈ। ਉਸ ਦੀਆਂ ਪ੍ਰੀਖਿਆਵਾਂ 11 ਤੋਂ 20 ਜੁਲਾਈ ਤੱਕ ਤਿਹਾੜ ਜੇਲ੍ਹ ਦੇ ਪ੍ਰੀਖਿਆ ਕੇਂਦਰ ਵਿੱਚ ਹੋ ਰਹੀਆਂ ਹਨ ਅਤੇ 20 ਜੁਲਾਈ ਨੂੰ ਦੁਪਹਿਰ 2 ਤੋਂ 5 ਵਜੇ ਤੱਕ ਉਸ ਦਾ ਆਖ਼ਰੀ ਪੇਪਰ ਹੈ।
ਜ਼ਿਕਰਯੋਗ ਹੈ ਕਿ ਸ਼ਰਧਾ ਵਾਕਰ ਦੀ ਮਈ 2022 ਵਿੱਚ ਕਥਿਤ ਤੌਰ ‘ਤੇ ਉਸ ਦੇ ਲਿਵ-ਇਨ ਸਾਥੀ ਆਫ਼ਤਾਬ ਅਮੀਨ ਪੂਨਾਵਾਲਾ ਨੇ ਹੱਤਿਆ ਕਰ ਦਿੱਤੀ ਸੀ। ਇਸ ਮਾਮਲੇ ਦੀ ਸੁਣਵਾਈ ਦਿੱਲੀ ਦੀ ਸਾਕੇਤ ਅਦਾਲਤ ਵਿੱਚ ਜਾਰੀ ਹੈ ਅਤੇ ਅਭਿਯੋਗ ਪੱਖ ਦੇ ਕਈ ਗਵਾਹਾਂ ਦੇ ਬਿਆਨ ਅਜੇ ਬਾਕੀ ਹਨ।